Era poblacion de Garòs s’a vestit de gala pendent aguesta passat fin de setmana gràcies ar eveniment de Salsa, Bachata, Kizomba (SBK), organizat per Balharan e patrocinat integraments per Ajuntament de Naut Aran.
Ath torn de 400 persones poderen gaudir de forma gratuïta de 20 talhèrs e tres dies de balh enes que se podie apréner e perfeccionar estils coma era bachata tradicionau, eth kizomba o eth casino, comunament nomentada Salsa cubana. Un des aspèctes mès positius d’aguest hestau a estat era grana capacitat d’adaptabilitat entàs diferenti nivèus qu’auien es participaires.
Eth baile der Ajuntament de Naut Aran, César Ruiz-Canela, destaque que “aguest tipe d’eveniments sociaus, ludics e culturaus coma eth SBK son un gran impuls entà pòbles coma Garòs que lo poténcien ath maximom e que, ath delà, a coïncidit damb es sues hèstes majors entà aufrir un gran programa a toti es nòsti vesins d’aguesta localitat. Credem qu’a auut ua grana acceptacion e açò mos aumplís de gòi.”
Ath sòn torn, er organizador deth hestau SBK, Javier Barbosa a arregraït “ar Ajuntament de Naut Aran, ara brigada e as municipaus atau coma ara EMD d’Arties e Garòs tota era ajuda qu’an aufrit tà qu’aguest eveniment age gessut endauant d’ua forma excellenta e damb ua grana qualitat. Es vesins de Garòs mos an mostrat ua grana proximitat e arregraïment en tot portar eth hestau en pòble”.
En aguest sens, eth sector comerciau e ostalèr de Garòs a generat un bon impacte economic pendent aguesta fin de setmana gràcies ara preséncia de clients dera madeisha Val d’Aran atau coma de dehòra deth territòri.