Deth 7 ath 10 d’agost se celebrarà eth tresau hestau culturau Sons dera Garona qu’a lòc en Salardú e que prebotge era lengua gascona e occitana autant coma d’autes activitats vinculades ath ruralisme, era literatura o es tradicions.
Aguest eveniment a coma un des sòns objectius eth poder conéisher de prumèra man era cultura de tota era Garona qu’arribe enquia Bordeus dera man d’artistes que parlen eth gascon e er occitan e que non son grops tant mediatics e reconeishuts coma es que d’abituda s’escoten.
Pendent aguesti dies s’haràn visites guidades en Sant Andrèu de Salardú e era tor, talhèrs de percussion, de polifonies, de poesia, presentacions coma es der escrivan Xavi Gutiérrez, mercats e tot açò sense descuedar era musica que serà er èish centrau.
Era tinent d’alcalde e còsso de cultura, Anna Geli, destaque que “ei un hestau a on se centre sustot era musica aranesa e occitana, de caractèr locau, mès qu’ei adaptat entà toti es publics e visitaires que se volguen apropar pendent aguesti dies entà Naut Aran. Coma anecdòta, rebrembi que i auie un grop de València que dançaue e coneishie era cultura de dança occitana e aquerò mòstra qu’era nòsta lengua ei internacionau”.
Sons dera Garona se definís coma un hestau locau de patrimòni aranés-occitan e qu’ei dubèrt a totes es persones que volguen assistir. Eth centre neuralgic serà ena plaça Major de Salardú autant coma ena glèisa, que son dus des punts mès subergessents d’aguest endret.